Эки тараптуу экономикалык алакаларды өнүктүрүүдө негизги драйверлердин бири болуп калган Россия–Кыргыз өнүктүрүү фондунун ишине жогору баа берилди. Бул тууралуу президент Садыр Жапаров Россия президенти Владимир Путин менен болгон сүйлөшүүлөрдүн жыйынтыгы боюнча ЖМК үчүн билдирүүсүндө айтты.
Өлкө башчысы белгилегендей, Фонд түзүлгөн күндөн тартып Кыргызстандын экономикасына 1 млрд АКШ долларынан ашуун инвестиция салып, республиканын аймагындагы үч жарым миңден ашуун долбоорду каржылады.
“Натыйжада инвестициялардын жалпы көлөмү фонддун баштапкы уставдык капиталынан эки эсеге көбөйдү. Бүгүнкү күндө фонддун катышуусу менен жалпы суммасы 175 миллион АКШ долларынан ашык болгон 14 гидроэнергетикалык жана кайра жаралуучу энергия булактарынын курулушу каржыланууда”, — деди Садыр Жапаров.
