Бүгүн, 29-ноябрда Кыргызстандын U-18 айымдар курама командасы Борбор Азиянын футбол ассоциациясынын — CAFA U-18 Women’s Championship эл аралык мелдешинин жыйынтыктоочу туру алкагында Тажикстанга каршы кез келди. Бул тууралуу Кыргыз футбол биримдиги кабарлайт.
Ташкент шаарында орун алып жаткан бул мелдешке Кыргызстандан сырткары Иран, Тажикстан, Түркмөнстан жана Өзбекстан курама командалары катышууда.
Бүгүнкү беттеш курама командабыздын 5-0 эсебиндеги ири эсеп санындагы жеңиши менен аяктады.
Голдордун авторлору — Сумая Махаматсалиева (17′), Анеля Асанбекова (27′), Акылай Мейманалиева (30′), Акмарал Саякбаева (66′, 68′).
«Испаниялык адис Антонио Месанын жетекчилиги алдындагы биздин курама бул мелдештин алкагында буга чейин Иран жана Түркмөнстан курамаларын 1-0 эсебинде утуп, Өзбекстандан 3-0 эсебинде жеңилүү ызасын тарткан. Жыйынтыгында, курамабыздын капчыгында 9 упай бар, ал эми мелдештин жалпы жыйынтыгы бүгүнкү Өзбекстан-Иран беттешинен кийин белгилүү болот», — делет маалыматта.
