Президенттин Иш башкаруучусу Каныбек Туманбаев Жогорку Кенештин депутаттарын мөөнөтүнөн мурда шайлоого катышып, системанын ишин жеке текшерүү үчүн атайын аралыктан добуш берди.

Кыргызстандын тарыхында биринчи жолу жарандарга кайсы шайлоо участкасына барбасын, ошол жерде добуш берүү мүмкүнчүлүгү түзүлдү. Система жаранды автоматтык түрдө таанып, анын катталган округуна ылайык бюллетень чыгарууда.

Каныбек Туманбаев белгилегендей, аралыктан добуш берүү форматы жарандар үчүн мүмкүн болушунча ыңгайлуу шарт түзүүгө багытталган. Анткени өлкөнүн тагдыры ар бир жарандын добушу менен чечилет. Буга чейин шаарда жашап, бирок башка аймакта катталган көптөгөн жарандар шайлоого катыша албай келген. Эми ар бир адам өзүнүн маанилүү жарандык милдетин толук аткара алат. Ошондой эле Туманбаев Борбордук шайлоо комиссиясынын (БШК) техникалык камсыздоосунда «Кызмат» мамлекеттик мекемесинин ролу өзгөчө маанилүү экенин белгиледи.

«Кызмат» ММ — БШКнын техникалык оператору, башкача айтканда, шайлоо процессинде колдонулган бардык санариптик системалардын, программалык камсыздоонун жана жабдуулардын үзгүлтүксүз иштеши үчүн жооптуу мекеме.

«Кызмат» мамлекеттик мекемесинин адистери БШКнын санариптик инфраструктурасын туруктуу иштетип, техникалык колдоону камсыз кылууда. Туманбаев алардын эмгегин жогору баалап, мындай масштабдагы санарип системаны өзүбүздүн адистердин күчү менен иштеп чыгуу олуттуу технологиялык жетишкендик экенин баса белгиледи. Мындан тышкары, Президенттин Иш башкаруучусу «Кызмат» мамлекеттик мекемесинин жетекчисине шайлоо маалында бардык техникалык системалардын үзгүлтүксүз жана ишенимдүү иштешин камсыздоону, мүмкүн болгон мүчүлүштүктөрдү алдын алууну тапшырды.

Туманбаев ошондой эле жарандар үчүн мындай шарттар Президент Садыр Жапаровдун колдоосу менен түзүлүп жатканын белгилеп, мамлекет башчы санариптик мамлекеттик кызматтарды өнүктүрүү жана элге ыңгайлуу шарттарды түзүү багытында системалуу иш алып барып жатканын айтты.