Баткенде мыйзамсыз курулуш боюнча эскертүү берилип, айып салынды. Бул тууралуу Курулуш, архитектура жана турак жай-коммуналдык чарба министрлигинин басма сөз кызматы билдирди.
Маалыматка ылайык, Баткен облусуна караштуу Кадамжай шаарынын Орозбеков көчөсүндө курулуп жаткан ашкананын 2-кабаты боюнча тиешелүү архитектуралык документтери жок курулуш-монтаждоо жумуштары башталгандыгы, мындан тышкары техникалык коопсуздук эрежелери толук аткарылбагандыгы аныкталган.
Натыйжада ашкананын ээси Н. Алимжановго карата башкармалык тарабынан акт түзүлүп, жазуу түрүндө эскертүү берилди. Ошондой эле административдик протоколдун негизинде 200 000 (эки жүз миң) сом айып салынды. Мындан сырткары, ашкананын экинчи кабатындагы курулуш иштери боюнча тиешелүү документтерди алуу талабы коюлду.
