«Ура! Бизде коргоочубуз пайда болду. Эми эч ким медиктерге кол көтөрө албайт. Медициналык мекемелердеги зомбулук нөлгө түшөт. Медайымдарга жана дарыгерлерге карата кемсинтүү, уруш-талаш, сөгүнүү сөздөр токтойт. Блогерлердин медициналык маалыматтарды бурмалоосу, провокациясы көзөмөлгө алынып, жазаланат. Элдин медициналык кырсыктардан хайп издеп, пайда тапкан жөнөкөй обывательдери азаят. Сантехниктер да, депутаттар да дарыгерлерге кантип дарылоону үйрөтө албай калат. Медиктерди жумуш ордунан колуна кишен салып алып кетүү токтоп, анын ордуна миллиондогон, миллиарддаган каражаттарды уурдаган коррупционерлер жоопко тартылат.

Мекемелерге мыкты жетекчилер тандалат, креслосун сактап калуунун айласын кылган казнокрадар, деспот жетекчилер кызматтан кетет. Чыныгы эсеп-кысап менен негизделген базалык муктаждыктар үчүн азыркы 2026-жылга бекитилген 52 млрд сомго кошумча дагы кеминде 50 млрд сом бюджеттен бөлүнөт.

Медициналык кызматтардын реалдуу баасы менен өздүк наркы ачыкка чыгат.Саламаттык сактоо министрлиги, ФОМС, ЖОЖдор көйгөйлөрдү жашырбай, Кабминде үнү угулган күчтүү бир органга айланат — шыбыраган үн эмес, ачык позиция.

Минздрав ГКНБ үчүн жаңыдан курулган төрт чоң имараттай эле деңгээлдеги жаңы имарат алат. Болбосо эскисинде деле калса болот — бул эң башкы эмес нерсе.

Эң негизгиси — медиктерге турак-жай маселеси.
МИК аркылуу 4% менен, баштапкы төлөмсүз үй алуу мүмкүнчүлүгү.
Айлык маяна көтөрүлүп, ГКНБ кызматкерлеринин айлыгынан төмөн болбойт. Эмне үчүн Минздравдын мээсиндей деп эсептелген ЦРЗИТтин адиси болгону 7000 сом маяна алат? Бул маселе такталат!

Медиктер үчүн балдар бакчалары жана мектептер боюнча преференциялар болот. Жаш дарыгерлерге жана региондорго барган адистерге жеңилдиктер — үй, жер тилкеси, мыйзам чегиндеги көтөрмө акча, коммуналдык, батир жана транспорт чыгымдарын төлөп берүү. Жаш дарыгерлердин депозиттери ачык-айкын көбөйтүлөт — кимдер алат, канча алат, баары түшүнүктүү болот.

Жана эң негизгиси — дары-дармек, медоборудование, лабораториялар боюнча ак халатчан коррупцияны, уурдоону токтотуу. Ал жакта чоң көлөмдөгү көмүскө агымдар, ачык көрүнгөн коррупциялык тобокелчиликтер бар.

Баш аламандык менен тартипсиздик иреттелет.
Жеке ЖОЖдор жана жеке клиникалар мыйзам чегинде тартипке келет.
Жогору жакка коркпой түз караган министр болот — медицинага колдоо көрсөткөн, тонобогон жетекчилик.

Көрдүңүздөрбү, кандай карайт?
Баягыдай эч нерседен, эч кимден коркпогон көз караш.
Алга! Пиджагыңарды чечип, жеңди түрүп, мына ошол тик караган көз менен — амбразурага, медициналык алдыңкы сапка, медиктер үчүн, бейтаптар үчүн, элдин саламаттыгы үчүн!»