Кыргызстандын Германиядагы элчиси Өмүрбек Текебаев 19-декабрда Барлебен шаарынын мэри Франк Назе жана жергиликтүү ишкерлер менен жолугуп, кызматташууну келишти. Бул тууралуу ал социалдык баракчасы аркылуу билдирди.

Анын айтымында, Барлебен шаарына 8-10 миң жумушчу керек.

“Калкы болжол менен 10 миң адамды түзгөн шаарда бүгүнкү күндө 8 миңге жакын адам иштейт. Ошол эле учурда шаар экономикасы дагы кошумча 8–10 миң жумушчу күчүнө муктаж. Барлебен шаары Магдебург шаарынын жанында жайгашкан. Анын аймагында жүзгө жакын ишкана иш алып барат, мындан тышкары миңге жакын ишкана каттоодон өткөн. Шаардын ички дүң өнүмү (ИДП) 700–800 млн еврону түзөт. Шаар Кыргызстан менен кадрларды даярдоо, жарандарды жумушка орноштуруу жана өндүрүштүк байланыштарды өнүктүрүү багытында кызматташууга кызыкдар. Бургомистр ашыкча бюрократиясыз колдоо көрсөтүүгө, анын ичинде жумушка орноштуруу жана турак жай маселелерин чечүүгө даяр экенин ырастады. Апрель айында ишкерлер ортосунда түз байланыштарды түзүү максатында чакан бизнес-форум өткөрүү, ошондой эле Барлебен шаары менен Кыргызстандын шаарларынын биринин ортосунда боордош шаар мамилесин түзүү боюнча макулдашууга жетиштик. Кол ийрисине тартат дегендей, Барлебен менен Базар-Коргон шаарын достоштуруп койсомбу деп турам”, — дейт ал.