Жогорку Кеңештин жыйынында депутат Дастан Жумабеков мигранттардын маселесин көтөрдү.
Ал Россияда иштеп жаткан жарандардан абдан көп кайрылуулар түшүп жатканын баса белгиледи.
«Мигранттар ал жакта укуктарыбыз тебеленип, кыйналып жатабыз деп даттанып жатышат. Көйгөйлөрү абдан көп. Ошондой эле биздин тигүүчүлөр да жүктөрүбүз Россиянын чек арасында токтоп турат, товарды өткөрбөй жатышат деп ыйлактап жаткан учуру. Жогорку Кеңештин жаңы депутаттары шайланды, эми сиз спикер катары Володин жана Матвиенко менен расмий жолугушуу уюштуруңуз. Депутаттарды Москвага алып барып, бетме-бет сүйлөшүүлөрдү өткөрүңүз. Биздин милдетибиз — элдин көйгөйүн чечүү», — деп айтты ал.
Өз кезегинде төрага Нурланбек Тургунбек уулу бүгүнкү күндө ага Федерация Кеңешинин төрайымы Валентина Матвиенко жана Мамлекеттик Думанын төрагасы Вячеслав Володинден расмий сапар менен келүүгө чакыруу келгенин белгиледи.
«Үстүбүздөгү жылдын март айынын үчүнчү декадасында сапар менен барып, ал жерде бул көйгөйлөрдү карап чыгабыз», — деп жооп берди ал.
