Кыргызстанда Шанхай кызматташтык уюмуна (ШКУ) мүчө мамлекеттердин жаш окумуштуулары үчүн эл аралык илимий-билим берүү лагери өтөт. Ага катышуу үчүн өлкөгө Өзбекстандын делегациясы келди.
Агартуу министрлигинин маалыматына ылайык, делегациянын курамында 15 окуучу жана 2 профессор бар. Конокторду «Манас» эл аралык аэропортунан министрликтин Мектептик билим берүү башкармалыгынын башчысы Мелисбек Музулманов тосуп алды.
Лагердин максаты – ШКУга мүчө мамлекеттердин мектеп окуучуларынын ортосунда тажрыйба алмашууну кеңейтүү, илимий кызматташтыкты чыңдоо жана биргелешкен жаңы демилгелерди өнүктүрүү.
Иш-чара Кыргызстандын ШКУга төрагалык кылуусунун алкагында Агартуу министрлиги тарабынан уюштурулууда.
