Казакстанда Алматыдан Ысык-Көлгө чейин түз баруучу жаңы автожол куруу маселеси каралууда. Бул тууралуу Kazinform агенттиги маалымдады.
Маалыматка ылайык, жаңы жолдун узундугу болжол менен 100 чакырымды түзүп, долбоор мамлекеттик-жеке өнөктөштүктүн негизинде ишке ашырылышы мүмкүн.
Казакстандын Мамлекеттик-жеке өнөктөштүк борборунун башкармалыгынын төрагасынын биринчи орун басары Айдос Көбетовдун айтымында, учурда долбоордун техникалык-экономикалык негиздемеси даярдалып жатат. Бул ишке Азия өнүктүрүү банкы да катышууда.
Учурда Алматыдан Ысык-Көлгө чейин болжол менен 400 чакырым жол жүрүп, 6-7 саат убакыт кетет. Жаңы автожол курулса, аралык 100 чакырымга чейин кыскарып, жол жүрүү убактысы кыйла азаймакчы.
Техникалык-экономикалык негиздеме даяр болгондон кийин документ мамлекеттик экспертизага жөнөтүлөт. Андан соң долбоордун экономикалык натыйжалуулугу Казакстан жана Кыргызстан тарабынан бааланып, эки өлкө тең колдоо көрсөткөн учурда автожолду куруу боюнча сынак жарыяланат.
