Ошто кызганычтан улам адам өлтүрүүгө шектелген жоокер кармалды. Бул тууралуу Ош шаардык милициясы билдирди.
Маалыматка ылайык, 23-августта милицияга Төлөйкөн конушундагы үйлөрдүн биринен 35 жаштагы кишинин асылган сөөгү табылган. Окуя болгон жерди кароо учурунда милиция кызматкерлери маркум өз жанын кыйбаганын, киши колдуу болуп каза болгонун аныкташты.
Бул факт боюнча иш козголуп, Оштогу аскер бөлүктөрүнүн биринде келишим менен кызмат өтөп жүргөн 20 жаштагы жигит кармалды. Ал кылмышын мойнуна алып, курбу кызын кызганып ушундай кадамга барганын билдирген.
Учурда шектүүнүн көрсөтмөлөрү текшерилип, окуянын бардык жагдайларын аныктоо боюнча тергөө иштери уланууда.
