Ошто бажы кызматынын эки инспектору кызмат абалынан кыянаттык менен пайдаланууга шектелип кармалды. Бул тууралуу УКМК билдирди.
Маалыматка ылайык, «Ош» бажысынын «БИМИ Ош сервис» бажылык тариздөө пунктунун текшерүү тобунун инспекторлору К.У.Т. жана Т.А.М. кармалган.
Тергөөдө бажы кызматкерлери айрым тышкы экономикалык ишмердүүлүктүн өкүлдөрү менен алдын ала сүйлөшүп, материалдык сый акы алуу үчүн товарларды тиешелүү текшерүүдөн өткөрбөй, туура эмес декларацияланып өтүшүнө көмөктөшкөнү аныкталган.
Натыйжада мыйзамда каралган бажы жол-жоболорунан жана көзөмөлдөн качууга шарт түзүлүп, мамлекетке олуттуу материалдык зыян келтирилгени айтылды.
Кармалгандар УКМКнын тергөө абагына киргизилди. Учурда кылмыштуу схемага катыштыгы бар башка бажы кызматкерлерин аныктоо боюнча тергөө иштери уланууда.
