Түркиянын Стамбул шаарындагы Рами китепканасы 2026-жылдагы «Жашыл китепкана» эл аралык сыйлыгынын «Ири масштабдагы долбоор» номинациясында биринчи орунду ээледи. Сыйлык Эл аралык китепкана ассоциациялары жана мекемелери федерациясы тарабынан берилет.
Рами китепканасы тарыхый мурасты сактоо менен экологиялык туруктуулукту айкалыштырган долбоору үчүн 27 өлкөдөн сунушталган 62 долбоордун арасынан тандалды.
1826–1828-жылдары курулган Рами казармасы реставрацияланып, 2023-жылы китепкана катары кайра ачылган. Анын жалпы жабык аянты 36 миң чарчы метрди түзүп, 4 миң 200 адамга ылайыкталган.
Китепкананын аймагындагы 51 миң чарчы метр жер жашылдандырылган. Бул жерде жүздөгөн дарак, миңдеген бадал, биологиялык көлмө жана камыш тилкелери бар. Мындан тышкары, жаан суусу кайра пайдаланылып, күн энергиясы жана энергияны үнөмдөөчү технологиялар колдонулат.
Рами китепканасы 24 саат иштейт. 2023-жылы ачылгандан 2025-жылдын соңуна чейин ага 8,2 миллиондон ашык адам барган.
