Кыргыз улуттук «Манас» театры залкар манасчы Мамбет Чокмор уулунун 130 жылдык мааракесине карата 30 жашка чейинки жаш манасчылардын республикалык кароо-сынагын өткөрөт. Бул тууралуу маданият, маалымат жана жаштар саясаты министрлиги билдирди.
Кароо-сынактын негизги максаты – манасчылык өнөрдү жайылтуу жана өнүктүрүү, жаш манасчыларды колдоо, жаңы ысымдарды элге таанытуу жана айтуучулук өнөрдү алып жүргөн жаш муундардын чыгармачылык дараметин арттыруу.
Сынак эки айлампада өткөрүлөт:
- 1-айлампа – 12-октябрда Кыргыз улуттук «Манас» театрында өтөт. Катышуучулар эркин темада манас айтышат;
- 2-айлампа – 22-октябрда Ысык-Көл облусунун Тоң районунун Бөкөнбаев айылында өтөт. Катышуучулар билет аркылуу туш келген темада манас айтышат.
Кароо-сынактын жеңүүчүлөрү калыстар тобу тарабынан аныкталат. Калыстар тобунун курамына ар кыл курактагы 3–5 адис кирет. Упайлар тең болуп калган учурда катышуучуларга кошумча суроолор берилет.
Жеңүүчүлөргө байгелүү орундар жана белектер тапшырылат.
