Корянын KOICA агенттиги 5 жыл бою Кыргызстандагы киберкоопсуздук боюнча долбоорду каржылайт. Долбоорду ишке ашырууга 5 млн АКШ доллары сарпталат. Бул тууралуу УКМКнын басма сөз кызматы кабарлады.

Маалыматка ылайык, бүгүн 13-сентярь УКМК менен Корея Эл аралык Кызматташтык Агенттиги (KOICA)  «Кыргыз Республикасында компьютердик инциденттерге ыкчам чара көрүү борборун (SOC) түзүү» гранттык долбоорун ишке ашыруу боюнча талкуулоо протоколуна кол койду.

Салтанатка УКМК төрагасы генерал-лейтенант Ташиев Камчыбек, Корея Республикасынын Кыргыз Республикасындагы атайын ыйгарым укуктуу элчиси Ли Вонджэ мырза жана KOICA өкүлчүлүгүнүн Кыргызстандагы директору мырза Ли Жонгсу катышты.

«Кыргыз Республикасында компьютердик инциденттерге ыкчам чара көрүү борборун (SOC) түзүү» долбоору, өлкөдөгү киберкоопсуздуктун абалын бекемдөөгө багытталган.

KOICA долбоорунун алкагында, SOC борборун түзүү, жабдуулар жана программалар менен камсыздоо, мамлекеттик органдардын киберкоопсуздугун коргоо жана адамдык потенциалды өнүктүрүү боюнча чечимдерди жайылтуу пландаштырылууда. Долбоор 2021-жылдын 2025-жылга чейин созулат.