Жеке жана финансы секторун шашылыш колдоо долбоорун ишке ашыруу башталды. Бул тууралуу Экономика жана финансы министрлигинин маалымат кызматы билдирди.
Аталган программа Дүйнөлүк банк жана Азия инфраструктуралык инвестициялык банкынын колдоосу менен жүзөгө ашырылууда. Министрлик каражат пайызсыз негизде берилгени менен ал сумманы кайтаруу шарты бар экенин белгиледи. Башкача айтканда, үстөк пайыз кошулбай, негизги сумманы гана кайтарат.
«Долбоордун максаты — майда, чакан жана орто ишканаларга COVID-19 пандемиясынан келип чыккан кризистен чыгууда, экономиканын басаңдашын жеңил өткөрүүгө жана жумуш орундарын сактоого жардам берүү. Анын алкагында 72 миллион доллар өлчөмүндө пайызсыз каражат берилет. Бул болжол менен 6 миллиард 84 миллион сом», — деп айтылат маалыматта.
Патент менен иштеген майда ишкерлер үчүн жалпы 30 миллион доллар бөлүнөт. Ар бир карыз алуучуга 100 миң сомдон каралган;
Салык төлөп келген чакан, орто ишканаларга, юридикалык жана жеке тараптарга 42 миллион доллар берилет. Ар бир ишкер 825 миң сомго чейин ала алат.
Бул иштерди аткаруу үчүн төмөнкү банктар менен келишим түзүлдү:
- «Айыл банк»;
- «Азия банкы»;
- «ФинансКредитБанк»;
- «Кыргызстан коммерциялык банкы»;
- «Борбордук Азиялык Капитал банкы».
- «Халык Банк Кыргызстан»;
- «Керемет банк»;
- «Дос-Кредобанк».
