Шайлоо жана референдум өткөрүү боюнча борбордук комиссиясы 30-октябрда Жогорку Кеңешинин депутаттарын шайлоого катталган саясий партиялар менен бир мандаттуу шайлоо округдары боюнча талапкерлердин арасында шайлоо бюллетенине киргизүүдөгү кезектүүлүктү аныктоо боюнча чүчүкулак өтөөрүн жарыялады.
Чүчүкулакка талапкерлер, саясий партиялардын жана бир мандаттуу шайлоо округдары боюнча талапкерлердин ыйгарым укуктуу өкүлдөрү, жалпыга маалымдоо каражаттарынын өкүлдөрү жана коомдук байкоочулар катыша алышат.
Бир мандаттуу шайлоо округдары боюнча БШКга 381 жарандан шайлоого катышуу ниетин билдирген арыз келип түшкөн. Алардын ичинен 14ү шайлоого катышуудан баш тартып, 330у талапкер катары катталган.
Ал эми партиялардын талапкерлерин каттоо учурда уланып жатат, аныгыраагы бүгүн, 29-октябрь кечки 18:00дө жыйынтыкталат. Азырынча 21 партиядан 1 046 талапкер каттоодон өткөн. Алардын ичинен 669 – эркек, 377 – аял.
