Бишкектин Биринчи Май райондук соту КР Кылмыш-жаза кодексинин «Он алты жашка чыга элек адам менен жыныстык катнашка баруу жана башка сексуалдык мүнөздөгү аракеттер» беренеси боюнча 23 жаштагы «С.Ж.» аттуу жаранга өкүм чыгарды.
Тергөөнүн версиясы боюнча, жигит жашы жете элек кызды бир нече жолу зордуктаган. Ал учурда кыз 12 жашта болчу. Жигит ага үйлөнөм деп алдап кеткен.
«Соттун жүрүшүндө кыз айыпталуучуга койгон дооматынан баш тартты. Мындан тышкары, ал тергөө учурунда атасынын кысымы менен ага жалаа жапканын билдирген. А.С.нын айтымында, ал соттолуучу менен өз эрки менен жыныстык катнашка барган, ал тараптан эч кандай зордук-зомбулук болгон эмес. Ал эми С.Ж. өз күнөөсүн мойнуна алган жок. Анын айтымында, А.С. менен өз ара макулдашып, жыныстык катнашка барышкан», — деп айтылат соттун өкүмүндө.
Соттун жыйынтыгында С.Ж. күнөөлүү деп табылып, бирок ага карата козголгон кылмыш ишинин эскирүү мөөнөтү өтүп кеткендигине байланыштуу токтотулду.
