Сот Бишкектеги «Антошка» коомдук тамактануучу жайындагы жарылууга ижарачыны күнөөлүү деп тапты. Бул тууралуу Биринчи май райондук сотунун басма сөз кызматы билдирди.
Биринчи май райондук сотунун 5-ноябрындагы өкүмүнө ылайык, Абдил Карыпбеков Кыргыз Республикасынын Жазык Кодексинин 261-беренеси менен күнөөлүү деп табылып, коомдук тамактануу тармагында эки жылдык мөөнөткө ишкердик иш жүргүзүү укугунан ажыратуу менен 2 (эки) жыл 6 (алты) айга эркиндигинен ажыратылган.
«КР Жазык Кодексинин 83-беренесинин негизинде Карыпбеков 1 жылдык мөөнөткө пробациялык көзөмөлдү колдонуу менен эркиндигинен ажыратуу түрүндө жазаны өтөөдөн бошотулду. Ошондой эле, Карыпбеков өрттөн жабыркаган 2 жаранга 50 миң сомдон компенсация төлөөнү милдеттендирди.
Эске салсак, Бишкекте 2019-жылдын 8-ноябрында тез тамактануучу жайда жарылуу болгон. Өрттүн кесепетинен кафенин кызматкери каза болуп, 13 адам жабыркаган.
