«Женго» каймана аты менен белгилүү кримтөбөл Кадыр Досонов үй камагына чыгарылды. Бул тууралуу Ош облустук сотунун басма сөз кызматы билдирди.
Маалыматка ылайык, 4-декабрда Жазык кодексинин 207-беренесинин (бөтөн жер участогун өзүм билемдик менен ээлеп алуу жана максаттуу багытын бузуу менен айыл чарба багытындагы жерлерге өзүм билемдик менен курулуш куруу) 3-бөлүгү, 215-беренесинин (кылмыштуу жол менен алынган кирешелерди легалдаштыруу (адалдоо) 3-бөлүгү боюнча шектелген Кадыр Досоновдун жазык иши боюнча тергөө иши аяктаган.
Ал эми иш 15-декабрда Кара-Суу райондук сотунун өндүрүшүнө алынган. 17-декабрда айыпталуучунун жактоочусу Н.Сүйүнбаева соттук териштирүү башталганга чейин алдын ала угуу боюнча айыпталуучунун бөгөт коюу чарасы жөнүндө өтүнүч менен кайрылган. Өтүнүч 23-декабрда каралып, канааттандырылган.
Жазык-процесстик кодексинин 166-беренесинин талабына ылайык, айыпталуучу К.Досоновго карата үй камагы түрүндөгү бөгөт коюу чарасы 2022-жылдын 15-февралына чейин тандалып, камактан бошотулду.
