Муниципалдык жерлерди мыйзамсыз курчап турган тосмолор алынып, ордуна тротуар курулуп, көрктөндүрүлөт. Бул тууралуу Жалал-Абад шаардык мэриясынын басма сөз кызматы билдирет.
Маалыматка ылайык, Жалал-Абад шаарынын Ленин көчөсүндө жайгашкан автобекет жана “Стамбул” деп аталган кафенин муниципалдык жерде турган тосмолору буздурулууда. Аталган жайлардын жол тарабындагы тосмолору алынган соң жөө адамдар жүрүүчү тротуарлар курулуп, жашылдандыруу иши жүргүзүлөт.
«Мыйзамсыз тосулуп, бир топ жылдардан бери пайдаланылып келген 2418 чарчы метрди түзгөн муниципалдык жер аянты да алдыда ижарага берилип, шаар казынасына каражат түшө баштайт»,- деп берилет билдирүүдө.
