Чаткал районунун Курулуш айылындагы жыгач устунга тирелген мектептин курулушу быйыл башталат. Бул тууралуу бүгүн президенттин Жалал-Абад облусундагы ыйгарым укуктуу өкүлү Абсаттар Сыргабаев мектептин абалы менен жеринен таанышуу учурунда билдирди.
Маалыматка ылайык, кооптуулук жаралган Сатимбай Мырзалиев атындагы орто мектептин имараттары 1961-1982-жылдары курулган. 2020-жылы ӨКМ тарабынан мекемеге авариялык абалда деген чечим чыгарылган. Учурда 150 орунга ылайыкташкан мектепте 461 бала билим алууда.
Облус башчысы Абсаттар Сыргабаев жергиликтүү бийлик жетекчилерине тез аранын ичинде курулушка керектүү документтерди даярдоо тапшырмасын берди. Алгач курулушка райондун өнүктүрүү фондунан 10 млн сом акча каражаты бөлүнөөрүн айтты. Калган каражаттар да этап менен камсыздалаарын кошумчалады.
