Чүй облусуна караштуу Ысык-Ата районундагы айланма жолдо жол кырсыгы катталып, анын кесепетинен 1 адам каза болду. Бул тууралуу милициянын кайгуул кызматы билдирет.
Маалыматка караганда, аталган кырсык 27-апрелде саат 16:50 чамасында катталган.
«Кемин районунун 1989-жылы туулган М.А. аттуу тургуну Опель Зафира кызматтык унаасы менен чыгыштан батышты көздөй бара жатып алдындагы КамАЗды (айдоочусу К.Б., 1975-жылы туулган, Бишкектин тургуну) артынан сүзүп алган. Кырсыктын кесепетинен Опель Зафира унаасынын айдоочусу кырсык болгон жерден көз жумган. Ошол эле жеңил унаанын эки жүргүнчүсү 1976-жылы туулган И.К. жана 1977-жылы туулган М.К. жаракат алып, Кант шаардык ооруканасына жеткирилген”,-деп айтылат маалыматта.
Алдын ала маалыматтарга ылайык, каза болгон адам ЭлТР мамлекеттик компаниясынын кызматкери болгон.
Жол кырсыгы каттоого алынып, унаалар айып короосуна токтотулду. Учурда тиешелүү экспертизалар дайындалды.
