Кечээ, 5-июнда Өзгөчө кырдаалдар министрлигине Жети-Өгүз районундагы Кой-Сары тилкесинде эки кыз көлгө чөгүп жаткандыгы тууралуу маалымат түшкөн. Бул тууралуу аталган кызматтын маалымат кызматы кабарлады.
Ага Каракол шаардык өзгөчө кырдаалдар бөлүмүнөн 4 жана Жети-Өгүз райондук өзгөчө кырдаалдар бөлүмүнөн 3 куткаруучу тартылган. Бирок, куткаруучулар жерине жеткичекти райондун Кой-Сары аскер базасынын кызматкерлери чөгүп бара жаткан кыздарды катер менен сүзүп барып, суудан чыгарып алышкан.
Жээке чыгарылган эки жаран ӨКМдин куткаруучуларына өткөрүлүп берилген. Андан соң куткаруучулар Жети-Өгүз менен Липенка айылынын кесилишиндеги ооруканага алып келип, медицина кызматкерлерине өткөрүп беришкен.
Алдын ала маалымат боюнча кыздардын абалы оор. Алар Липенка айылынын 22 жаштагы А.Б жана А.А. аттуу жашоочулары.
