Египетте өтүп жаткан Ibrahim Moustafa эл аралык мелдештин чейрек финалында Мээрим Жуманазарова атаандашына утулуп калды. Бул тууралуу Бириккен күрөш дүйнөсүнүн (UWW) сайтында жарыяланды.
Жуманазарова кыз-келиндер күрөшү боюнча 68 кг салмакта мелдештин 1/8 финалынан баштап катышууда. Жуманазарова болгариялык Юлиана Яневаны эки упай артыкчылыгы менен жеңип, чейрек финалга чыкты. Анда америкалык Форрест Энн Молинари менен кармашып, 3:6 эсебинде жеңилүү ызасын тартты.
Эгер америкалык спортчу финалга чыга турган болсо, анда Жуманазарова коло үчүн күрөшүүгө мүмкүнчүлүк алат.
Мелдеш 21-25-февраль күндөрү Александрия шаарында өтүүдө.
