Бүгүн, 14-мартта Баткен жана Ош облусу боюнча башкармалыгынын түзүмдүк бөлүмдөрүнө өрт өчүрүүчү унаалар тапшырылды. Бул тууралуу ӨКМден билдиришти.
Маалыматка ылайык, Ошко 10 «HOWO», 7 «KAMAZ» өрт өчүрүүчү авто унаа жана 1 «HOWO» берилсе, Баткенге 10 «HOWO», 4 «KAMAZ» өрт өчүрүүчү авто унаа жана 1 «HOWO» авариялык-куткаруу унаасы тапшырылды.
Заманбап өрт өчүрүүчү жаңы авто унааларды тапшыруу аземине президенттин Ош облусундагы ыйгарым укуктуу өкүлү Зиядин Жамалдинов, Баткен облусундагы ыйгарым укуктуу өкүлү Абдикарим Алимбаев катышып, жаңы унаалар атайын машыгууларда гана кызмат көрсөтүшүнө тилектештигин билдирди.
Эске салсак, ӨКМдин Баткен облусу боюнча башкармалыгына өткөн жылы да 4 өрт өчүрүүчү авто унаа жана жүргүнчүлөр үчүн 6 автобус алып келинген.
