Ноокат районунун аймагында эки баш мал уурдаган жарандар кармалды. Бул тууралуу Ош облустук ички иштер башкармалыгынын басма сөз кызматы билдирди.
Маалыматка ылайык, 2020-жылдын 6-декабрында саат 02:00 чамасында Кожо-Арык айылынын Ж.А. аттуу тургуну Ноокат районунун Кулатов айылындагы сарайынан 2 жана 4 жаштагы букаларын уурдап кеткендиги тууралуу көрсөтмө берип, арыз менен кайрылган.
Буга ылайык Ноокат райондук ички иштер органдары ыкчам-иликтөө жүргүзүшүп, кылмышка шектүүлөрдүн өздүктөрүн аныкташкан. Натыйжада Өзгөн районунун Шерали айылынын 38 жаштагы тургуну Н.К. жана Баткен облусунун Кызыл-Кыя шаарынын 31 жаштагы У.Э. экени тастыкталды.
«Кыргыз Республикасынын Кылмыш-жаза кодексинин 200-беренесинин (уурдоо) 1б пунктунун негизинде сотко чейинки өндүрүш иши башталды. Жоголгон малдын эти Баткен районунун Кызыл-Кыя шаарынын касапканасынан табылды. Жалпы чыгым 130 (жүз отуз) миң сомду түздү», — деп берилет маалыматта.
