Бузулган жолдорду аткаруучу (подрядчик) компаниялар өз каражаттарына калыбына келтиришет. Бул тууралуу Транспорт министрлигинен билдиришти.
«Атайын комиссия түзүп, Жалал-Абад облусундагы жаңы салынган жолдордун абалын текшерүүгө жибергем. Текшерүүнүн жыйынтыгында Таш-Көмүр — Кызыл-Жар жолуна, Ала-Бука районундагы Кажар айылындагы көчөнүн жолуна, ошондой эле Арстанбап-Базар-Коргон жолуна асфальт төшөгөн компанияларга чара көрүү сунушу берилди. Жогорудагы жолдорду салган аткаруучу (подрядчик) компаниялар өз каражаттарына бузулган жолдорду калыбына келтирүү боюнча кепилдик каттарын жазып беришти, аз убакыттын ичинде, белгиленген мөөнөттө бүтүрүп беришет.
Салынган жолдор толугу менен эмес, айрым жерлери -суу аккан же саздак жерлер бузулгандыктан, анын себебин лабораториянын жыйынтыгы аркылуу эксперттер айтышат. Мындан тышкары, жооптуу кызмат адамдарына да чаралар көрүлөт. Учурда баардык иш-чаралар көзөмөлдө!»- дейт Транспорт жана коммуникация министри Тилек Текебаев.
