Коомчулуктун кызыгуусун арттырган «Ватятъ», «Даканса», «Көз тийбесин», «Соода болсун», «Aygen», «Каppа болбо», «Досум Абрикосум», «Жаным Баклажаным», «Зыңк», «Ош базар 312», «Арпа» аталышындагы байпактар Кыргызстандын дээрлик соода дүкөндөрүндө, түйүндөрүндө сатыкка чыгып, элдин бүйүрүн кызытууда.

Бул кыргыздарга гана тиешелүү сыр сөздөрдү байпакка түшүрүп, өзүнчө бренд жаратып алган Кундуз Асаналиева элдин көңүлүн көтөрүү максат болгондугун айтууда.
Буга чейин Кундуз Асаналиеванын жолдошу Кореядан ак, кара жана боз түстөгү байпактарды алып келип чакан ишкерлик менен алектенген. Бренд жараткан байпактарды чыгаруу дал ушул бир түстөгү байпактардын көптүгүнөн пайда болуп, ага ар кандай сүрөт, жазууларды түшүрүү идеясы жаралган.

Андан соң өткөн жылдын октябрь айынан тарта сатыкка чыга баштаган.

«Башында бул байпактарды балдар эле киет, муну эмне кыласың, акылга сыйбаган нерсе деген терс пикирлерди уккам. Бирок азыр мен билем кабинетимде өзүм дагы дал ошондой байпак кийип отурганымды. Айрым жарандар аларды негизги сүрөт тактайчасына коюп алышты. Менимче, бул создөр менен эле токтоп кабайт. Жыл сайын эл оозуна көп алынган сөздордү чыгарып турушубуз керек. Себеби, «Даканса» деген байпак 3 жылдан кийин өзүнүн актуалдуулугун жоготуп салышы мүмкүн», — дейт ал.

Ал эми кечээ Бишкек шаарынын мэринин милдетин аткаруучу Балбак Түлөбаев өзүнүн социалдык баракчасына байпактар менен сүрөт жүктөп: ,»Өзүбүздөн чыккан кыргыз өндүрүш колдойлу», — деген пикир калтырган.