Бүгүн, 21-октябрда, Кыргыз күрөш федерациясынын кезексиз жыйыны өтүп, айымдар арасындагы вице-президентин шайлоо болду.
Кезексиз жыйын федерациянын жетекчиси Эркин Тентишевдин төрагалыгы алдында өттү. Кыргыз күрөш федерациясынын айымдар арасындагы мурунку вице-президенти Динара Исаева бул кызматта 10 жыл иштеп, эми аны жаштарга өткөрүп берүүнү көздөгөнүн билдирди.
Исаеванын айтымында, 10 жыл ичинде айымдар арасындагы күрөштө кыргыздын балбан кыздары көптөгөн ийгиликке жетти. Айымдар арасындагы күрөш боюнча Кыргызстандын азыр дүйнөдө өз орду бар, ага Айсулуу Тыныбекова, Мээрим Жуманазарова жана Айпери Медет кызынын жетишкендиктери айкын мисал.
Он жыл мурун өлкөдө 1 гана медаль болсо, азыр 170 медаль бар. Жетекчилик милдетин өткөрүп берип жаткан Динара Исаева өз ордуна Айсулуу Тыныбековадан башка татыктуу талапкер көрбөй турганын билдирди. Тыныбекованын талапкерлиги Федерациясынын тандоосуна коюлуп, колдоо тапты.
