Жалал-Абадда майыптыгы бар жаштар үчүн компьютердик класс ачылды. Бул тууралуу президенттин Жалал-Абад облусундагы өкүлчүлүгүнүн басма сөз кызматы билдирди.
Маалыматка ылайык, Аксы районунун Кош-Дөбө айыл өкмөтүндөгү окуу классынын ачылышы менен алыскы айылдагы майыптыгы бар балдардын заман талабына ылайык билим алуусуна шарт түзүлдү.
«Бул багытта айыл өкмөт тарабынан даярдалган долбоорду Жалал-Абад облустук өнүктүрүү фонду каржылаган. Ага жалпы 2 миллион 2 миң сом акча каражаты каралып, тендердик баасы 1 миллион 940 миң сомду түзгөн», — деп айтылат билдирүүдө.
Белгилей кетсек, бөлүнгөн каражатка компьютер, музыкалык аспаптар, эмеректер жана башка керектелүүчү техникалар алынган.