Кыргызстандын Аскер прокуратурасы УКМКнын Чек ара кызматынын кызматкерлерине Орхан Инандынын өлкөдөн мыйзамсыз чыгарылышы боюнча кылмыш ишин козгоду. Бул тууралуу Башкы прокуратуранын басма сөз кызматы тастыктады.
Ага ылайык, аталган факты боюнча Кылмыш кодексинин “Шалаакылык” жана “Чек ара кызматын аткаруунун эрежелерин бузуу” беренелери менен иш козголду.
Эске салсак, ушул жылдын 5-июлунда Түркиянын президенти Реджеп Тайип Эрдоган түз эфир учурунда атайын кызматтын операциясынын жыйынтыгында Орхан Инанды кармалып, Түркияга алып келингенин билдирген. Ал эми, Орхан Инанды Бишкекте 1-июлда дайынсыз жоголгон. Бишкектин ички иштер башкы башкармалыгынын маалыматына караганда, Орхан Инандынын Кыргызстандын жана Түркиянын жарандыгы бар.