Жогорку Кеңештин депутаты Шайлообек Атазов өлкөдөн качып кетип, сырттан интервью берген президенттерди жыйынга чакырды. Бул тууралуу сунушун ал бүгүн, 19-майда парламенттин кезектеги жыйынында билдирди.
Анын айтымында, жыйынга өлкөдөгү айрым көйгөйлөрдүн жаралуусуна түздөн-түз таасир эткен Кыргызстандын мурдагы Президенттери дагы катышышы керек.
«Бирөөсү Кремлде отуруп алып интервью берип жатса бирөөсү түрмөдө отурат. Алар өлкөнүн кызыкчылыгында болбогон чечимдерди кабыл алышкан. Жыйынга келип жооп беришсин», — деди ал.
Белгилей кетсек, жакында эле «Кумтөр» маселеси каралып, Кумтөр боюнча парламенттик комиссиянын төрагасы Акылбек Жапаров мурдагы Президенттер жана Премьер-министрлерди келишимге барганы боюнча айыптаган.
