Бишкекте коомдук транспорттун айдоочуларына эмгек акы төлөөнүн жаңы системасы ишке кирүүдө. Бул тууралуу мэриядан билдиришти.
Жаңы системага ылайык, айдоочулардын айлыгы эмгек талаптарын аткаруусуна, жумуш убактысынын нормасын сактоосуна жана иштин сапатына жараша аныкталат.
«Айдоочунун ишине байланыштуу даттануу келип түшүп, анын негиздүүлүгү тастыкталган учурда эмгек акынын өлчөмү 20%га чейин азайтылышы мүмкүн. Ошондой эле белгиленген жумуш убактысынын нормасы аткарылбаган учурда да айлыкты азайтуу каралган», — деп айтылат маалыматта.
Белгиленгендей, жаңы система айдоочулардын жоопкерчилигин жогорулатууга, эмгек тартибин сактоого жана жүргүнчүлөрдү тейлөөнүн сапатын жакшыртууга багытталган.
