Түркия мамлекетиндеги жер титирөөнүн очогу – Кахраманмараш жана Хатай шаарларындагы издөө-куткаруу иштерин аткарып жатышкан Өзгөчө кырдаалдар министрлигинин куткаруучулар тобу эртең, 21-февралда келишет. Бул тууралуу ӨКМден билдиришти.
Маалыматка ылайык, Бишкек убактысы боюнча түнкү саат 02:30да жана таңкы 09:00дө “Манас” эл аралык аэропортуна конушат.
Белгилей кетсек, Түркияга Кыргызстандан барган 170тен ашык куткаруучулар, медиктер жана психологдор иштеди. Мындан тышкары, Кыргызстандын бийлиги Түркияга гумжардам дагы жөнөткөн.
Акыркы маалыматтар боюнча, кыргызстандык куткаруучулар уранды алдынан 12 тирүү адамды жана 185 сөөктү алып чыгышкан.
