Массалык башаламандыктарды уюштуруу иши боюнча кармалгандар 10-апрелге чейин камакка алынды. Бул тууралуу Биринчи май райондук соттун басма сөз кызматы билдирди.
Камакта калтырылгандар:
- ички иштер министринин мурдагы орун басары Курсан Асанов;
- «Элдик парламенттин» координатору, премьер-министрдин аппаратынын мурдагы жетекчиси Бекболот Талгарбеков;
- Жогорку Кеңештин мурдагы депутаты Аалы Карашев;
- Кыргызстандын Өзбекстандагы мурдагы элчиси Эмилбек Узакбаев;
- президенттин Жогорку Кеңештеги мурдагы ыйгарым укуктуу өкүлү Курманбек Дыйканбаев.
Белгиленгендей, учурда Ички иштер министрлигинин Тергөө кызматы тарабынан «Массалык башаламандыкка даярданууну уюштуруу» беренеси боюнча кылмыш иши козголуп, тергөө иштери жүрүп жатат. Буга чейин өлкөдө массалык башаламандыктарды уюштурууга шектелген бир нече адам кармалган.
