Баткен шаарынын Базар-Башы кварталында Сыдык Айтматов атындагы мектеп курулууда. Билим уясы 500 орунга ылайыкташкан. Бул тууралуу президенттин Баткен облусундагы өкүлчүлүгүнөн билдиришти.
Типтүү мектептин курулушу республикалык бюджеттен каржалынууда — 133 млн сом. Курулуш иштери учурда 40% бүттү. Билим берүү мекемесин 2024-жылы пайдаланууга берүү пландалган. Аталган мектептин эски имараты жер титирөөдөн улам жараксыз абалга келген.
Белгилей кетсек, 2023-жыл ичинде Баткен облусунда жалпы 24 мектептин курулушу жана капиталдык оңдоп түзөө иштерин бүткөрүү пландалган. Бүгүнкү күнгө чейин анын ичинен 7 мектеп пайдаланууга берилди.
Учурда республикалык бюджеттин эсебинен курулуп жаткан дагы 6 мектеп пайдаланууга берүү алдында турат, 7 мектептин курулушу менен 5 мектептин капиталдык оңдоп түзөө иштерин, жыл соңуна чейин бүткөрүү белгиленген.
