Кыргызстандын аймагына жеткирилүүчү жана импорттолуучу товарларга нөл пайыз өлчөмүндө кошумча нарк салыгынын ставкасы белгиленди. Тийиштүү чечимге Министрлер кабинетинин төрагасы Акылбек Жапаров кол койду.
Аталган чечим президенттин 2021-жылдын 6-декабрындагы № 547 “Айыл чарба ишин жүргүзгөн субъекттерди колдоо боюнча чаралар жөнүндө” жарлыгын ишке ашыруу, ошондой эле өлкөнүн азык-түлүк коопсуздугун камсыз кылуу жана азык-түлүк товарларына рыноктук бааларды турукташтыруу максатында кабыл алынган.
Мындан улам Салык кодексинин 34-беренесинин 2-бөлүгүнүн 2-пунктуна, 2014-жылдын 29-майындагы Евразия экономикалык бирлиги жөнүндө келишимдин 29, 47-беренелерине, “Кыргыз Республикасынын Министрлер кабинети жөнүндө” Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер кабинети токтом кылат:
— Кыргыз Республикасынын аймагына жеткирилүүчү жана импорттолуучу товарларга нөл пайыз өлчөмүндө кошумча нарк салыгынын ставкасы белгиленсин;
— 2022-жылдын 1-январынан баштап 2024-жылдын 31-декабрына чейин айыл чарба жерлерин пайдалангандыгы үчүн салыктын нөл пайыз өлчөмүндө ставкасы белгиленсин.
