Бүгүн, 18-сентябрь 2020-жылдагы шайлоодо 300 000 доллар пара алууга шектелип кармалган, Жогорку Кеңештин мурдагы депутаты, «Кыргызстан» саясий партиясынын мүчөсү Руслан Чойбековдун баш коргоо чарасы каралды.
УКМК берген маалыматка ылайык, Бишкектин Биринчи Май райондук соту Чойбековго, тергөө иши бүткүчө камакка алуу түрүндөгү баш коргоо чарасын тандаган.
Мурда маалымдалгандай, УКМК тарабынан 2020-жылы өткөн парламенттик шайлоодо ири суммадагы акчаны алдоо жана мыйзамсыз алуу фактысы кайрадан аныкталды. «Кыргызстан» саясий партиясынын мүчөсү жана өлкөнүн парламентинин экс-депутаты Руслан Чойбеков тарабынан депутаттык мандат үчүн 300 000 АКШ доллары өлчөмүндөгү акча каражат алынып, арыз ээсине өзгөчө ири өлчөмдө зыян келтирилген.
2021-жылдын 16-сентябрында жүргүзүлгөн тергөө аракеттеринин жыйынтыгы жана алынган далилдердин натыйжасында, «Ч.Р.» аттуу жаран Кыргыз Республикасынын Кылмыш-жаза кодексинин 204-беренесинин 3-бөлүгү (Өзгөчө ири өлчөмдө жасалган алдамчылык) боюнча кылмышка шектүү катары кармалган.
