Бишкек шаарында 51 миңден ашык турак жай жаратылыш газына кошулду. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, мындай көрсөткүчкө жетүү турак жайларды газдаштыруу үчүн жеңилдетилген насыяларды берүүнүн аркасында мүмкүн болду.
Эскерте кетсек, министрлер кабинетинин тескемесине ылайык, жарандарга үйлөрүн газга туташтыруу үчүн 150 миң сомго чейин жылдык 3 пайыз менен жеңилдетилген насыялар берилүүдө. Буга чейин пайыздык чен 8 пайызды түзчү.
Министрликтен белгилешкендей, мунун натыйжасында борбор калаада көмүр керектөө болжол менен 100 миң тоннага азайып, бул шаардагы экологиялык абалга оң таасирин тийгизди.
