Социалдык тармактарда интернет колдонуучулар сүт базарындагы кризистен улам “Бишкексүт” ААКсына тиешелүү “Веселий Молочник” соода маркасы жабылганын жазышууда. Ал эми колдонуучу Арстанбек Саргалдаевдин айтымында, бир жумадан бери дүкөндөрдө «Веселий Молочник» брендинин товары сатыкта жок. Муну сатуучулар өндүрүштүн жабылышы менен түшүндүрүүдө.
Ал эми «Бишкексүт» ААКсы завод штаттык режимде иштеп жаткандыгын жарыялады.
«Достор, биздин завод штаттык режимде иштеп жатат. Болгону сезондук чийки сүт жетишсиздиги бар, ошондуктан сатуу түйүндөрүнө даяр сүт азыктарын жеткирүү үзгүлтүккө учурашы мүмкүн. Чийки сүт жетишсиздиги жакынкы күндөрү чечилип, сүйүктүү кардарларыбыз жакшы көргөн сүт азыктарын каалаган убакта каалаган жерде таба алышат деп үмүттөнөбүз», — деп жазылат анда.
