Бишкек шаары боюнча документи жок жер участокторуна быйыл апрелдин соңуна чейин 10 миң 744 техникалык паспорт берилди.
Бул тууралуу “Кадастр” мамлекеттик ишканасынын басма сөз кызматы билдиргендей, алардын 2392си Ленин, 4859у Биринчи Май, 3006сы Свердлов жана 487си Октябрь райондоруна туура келет.
Мекеме техникалык паспорттор жерди мыйзамдаштырууга укук бербей турганын, өзүм билемдик менен басып алынган бардык эле жерлер мыйзамдаштырылбай турганын эскертти.
“Электр чубалгылары, газ түтүктөрү өткөн, көрүстөндөргө, таштанды полигонуна жана суу ташкыны жүрүү коркунучу бар жерлерге жакын салынган үйлөр бар. Мындай участоктор 2 миң гектардан ашуун аймакты ээлейт. Бул кырдаалды жөнгө салуу үчүн өзүнчө мыйзам долбоору иштелип чыгып жатат”, -деп айтылат маалыматта.
