Бишкек шаарында ок атуучу куралдарды жана ок-дарыларды мыйзамсыз сактоого шектелген жаран кармалды. Бул тууралуу Бишкек шаардык ички иштер башкы башкармалыгы билдирди.
Маалыматка ылайык, Махатма Ганди жана Ала-Арча көчөлөрүнүн кесилишинде Toyota Corolla үлгүсүндөгү автоунаа текшерилип, жүргүнчүлөрдүн бирине таандык спорттук баштыктан ПМ жана REX PERFEKTA үлгүсүндөгү тапанчаларга окшош буюмдар, белгисиз үлгүдөгү тапанча-пулемётко окшош курал, ок-дарылар, төрт граната, беткап жана аскердик кийим табылган.
Аталган факты боюнча кылмыш иши козголду. Шектүү 1983-жылы туулган, мурда бир нече жолу соттолгон жаран экени аныкталды.
Шектүүнүн көрсөтмөсүнө ылайык, табылган баштык мурда өзү менен бирге жаза мөөнөтүн өтөгөн, уюшкан кылмыштуу топтун мүчөсү катары белгилүү болгон Чыңгыз Жумагуловго («Чыңгыз Дөө» каймана аты менен белгилүү) таандык болгон.
Учурда алынган курал-жарактар менен ок-дарылар соттук экспертизага жөнөтүлүп, тергөө иштери уланууда.
