Ленин районунун аймагында тышкы жарнамаларды жана маалыматтык көрнөк-жарнактарды жайгаштырууда дизайн-коддун талаптарын сактоо, ошондой эле башаламан жайгаштырылган электр жана интернет кабелдерин иретке келтирүү боюнча иштер жүргүзүлдү. Бул тууралуу мэрия маалымдады.
Чүй проспектисинин Павлов, К. Кулиев жана Б. Бейшеналиева көчөлөрү менен кесилишкен тилкелеринде, ошондой эле Манас көчөсүнөн (мурдагы Ю. Фучик көчөсү) Иманалы Айдарбеков көчөсүнө (мурдагы Жаш Гвардия бульвары) чейинки аралыкта ишкердик субъекттери тарабынан өз алдынча орнотулган жарнамалык конструкцияларды демонтаждоо иштери жүргүзүлдү.
Мындан тышкары, көрсөтүлгөн аймактардын көрктөндүрүлүшүн жана санитардык абалын жакшыртуу максатында башаламан жайгаштырылган кабелдер менен зымдарды жыйноо жана иретке келтирүү иштери аткарылды.
Жүргүзүлгөн иш-чаралар көчөлөрдүн эстетикалык көрүнүшүн жакшыртууга, коомдук тартипти камсыз кылууга, санитардык тазалыкты сактоого жана тышкы жарнамаларды жайгаштырууда дизайн-коддун талаптарын аткарууга багытталган.
