Бишкектеги «Диалог» маданият үйүндө «Мыкты чоң ата» жана «Мыкты чоң апа» сынактары өттү.
Муниципалитеттен билдиришкендей, иш-чара үй-бүлөлүк баалуулуктарды жана улуттук каада-салттарды сактоого багытталып, Дене тарбия жана спорт, туризм жана жаштар иштери боюнча департаменти тарабынан уюштурулду.
Сынакка он адам катышты, анын ичинде беш чоң эне жана беш чоң ата. Катышуучулар кыргыз улуттук каада-салттарын, ошондой эле чыгармачылыгын жана чеберчилигин көрсөтүштү.
Иш-чарада сайма сайуу, элдик кол өнөрчүлүк жана улуттук маданияттын байлыгын жана муундардын уландысын чагылдырган кыргыз оюусу түшүрүлгөн паннолор көрсөтүлдү.
Катышуучулар ошондой эле улуттук аспаптарда элдик ырларды, бийлерди жана музыкалык чыгармаларды аткарышты.
Сынактын жыйынтыгы боюнча бардык катышуучуларга «Мыкты чоң ата» жана «Мыкты чоң апа» медалдары тапшырылды.
