Бишкекте 30-ноябрдан баштап “Притон-көпөлөк” рейди башталып, натыйжада 1600дөн ашык кыз аныкталган. Бул тууралуу Бишкек ШИИБден билдиришти.
Милиция кызматкерлери сауналар, мейманканалар жана ижара батирлерди текшерип, профилактикалык иш-чаралар башталгандан бери 1 миң 600дөн ашык кыз аныкталып, райондук башкармалыктарга жеткирилип, алардын ар бири менен түшүндүрүү иштери жүргүзүлүп, анын ичинен 97 кыз кайрадан милиция бөлүмүнө чакырылган.
Ошондой эле, Тергөө кызматы тарабынан Кылмыш-жаза кодексинин 159 (сойкулук кылууга тартуу) жана 160 (сойкулукка жана ыпластыкка көмөктөшүү) беренелери боюнча кылмыш иши козголгон.
Тергөө иштеринин жүрүшүндө 16 шектүүгө жогорудагы беренелер боюнча айып берилип, аларга карата соттун чечими менен камакка алуу түрүндөгү баш коргоо чарасы колдонулуп, Бишкек шаарындагы №1 Тергөө камак жайына камакка алынган.
