28-ноябрда боло турган Парламенттик шайлоо — партиялык тизме жана бир мандаттуу система менен өткөндүктөн, шайлоо округдары кайра каралып чыкты. БШК 11-сентябр күнү жарыялаган маалыматка ылайык, калктын санына жараша 36 шайлоо округу тузүлдү.

«Ар бир округ 100 миң 476 +/- 20% шайлоочу болжолдуу саны менен түзүлдү. Мыйзамдарга ылайык шайлоо округдарын түзүүдө төмөнкү талаптар сакталды:

• шайлоо округдарынын шайлоочулардын саны боюнча болжолдуу теңдиги, мында шайлоочулардын өкүлчүлүгүнүн орточо ченеминен 20 пайыздан ашпаган четтөөгө жол берилет;
• шайлоо округу бирдиктүү аймакты түзөт, шайлоо округун өз ара чектешпеген аймактардан түзүүгө жол берилбейт.
• ушул көрсөтүлгөн талаптарды сактоодо, эреже катары, республиканын администрациялык-аймактык бөлүнүшү эске алынат» -деп жазылат расмий маалыматта.

Жогорку эки критерий бири-бирине карама каршы келип калган соң, БШКнын маалымат кызматына кайрылып, расмий жооп берүүсүн сурадык.   Кызыгы, 2 күн алдын жарыяланган округдардын бөлүнүшү боюнча маалымат сайттан да өчүп калган.

Салыштырмалуу калкынын саны көп Кара-Кулжа районун Алайга кошуп койгону таң калтырбай койбойт. 87 691 жарандын жарымы Алай районундагы округтарга, жарымы Өзгөн районуна кошулуп калган. Бул дегени, Кара-Кулжанын эли экиге бөлүнүп, өз аймагынан бир мандаттуу депутат шайлайт албай калат дегенге алып барат.

Кара-Кулжа районунун активдери  БШКнын бул чечими одоно оркоюп чыгып калган ката экендигин баса белгилеп, кайра каралышын талап кылышуда.