Чүй облусунда ишенип берилген мүлктү ыйгарып алуу жана коротуу фактысы боюнча шектүү кармалды. Бул тууралуу облустук милициядан билдиришти.
Маалыматка ылайык, 6-февралда Аламүдүн РИИБине “К.Ж.” фермердик дыйкан чарбасынын өкүлү, М.Б. аттуу жаран кайрылып, 1998-жылы туулган Ж.Э. аттуу жаранга чара көрүүнү суранган. Ал арызында, Ж.Э. 2025-жылдын октябрь айында чарбада малчы болуп иштеп, 50 баш музоонун багылуусу жана жайылтылышын 2026-жылдын апрель айына чейин өзүнө милдет алган.
Бирок 2026-жылдын январь айында аталган жаран өз алдынча малды сатып жиберип түшкөн каражатты онлайн казинодо уттуруп жибергени аныкталган. Материалдык зыяндын суммасы 3 700 000 сомду түзгөн.
Бул факты боюнча КРнын Кылмыш-жаза кодексинин 210-беренесине (Ишенип берилген мүлктү ыйгарып алуу жана коротуу) ылайык кылмыш иши козголуп, 96-беренеге ылайык, шектүү кармалып, убактылуу кармоочу жайга киргизилген.
Учурда тергөө иштери уланууда.
