Улуу Ата Мекендик согуштун ардагери Кошкоро Жаманкуловго Кара Балта шаарынан батир белек кылышты. Бул тууралуу президенттин Чүй облусундагы өкүлчүлүгүнөн билдиришти.
Маалыматка ылайык, Чүй облусуна караштуу Жайыл районунун мекеме, ишканалардын жана жергиликтүү өз алдынча башкаруу органдарынын кызматкерлеринин салымы менен үй алынган.
КРнын президентинин облустагы ыйгарым укуктуу өкүлү Канат Жумагазиев ага үйүнүн ачкычын тапшырган.
Ачкычты тапшыруу аземине Жогорку Кеңештин депутаты Нурланбек Азыгалиев, Жайыл районунун акими Төрөгелди Түркбаев, Суусамыр айыл аймагынын башчысы Максат Сейиткулов жана башкалар катышты. Райондун акими күндүн баатырына ардактуу атуул наамы ыйгарылганын билдирди.
Экинчи дүйнөлүк согуштун майыпы, 1924-жылы туулган Кошкоро Жаманкулов учурда кичүү уулу, келини жана неберелери менен Суусамырда, Кайсар айылында жашайт.
Аксакалдын үй-бүлөсү чоң – жети баласы, 31 небереси жана 58 чөбөрөсү бар.
