Бүгүн, Жогорку Кеңеште “чет элдик өкүл” мыйзамы боюнча парламенттик угуу өттү. Ага депутаттардан тышкары тийиштүү мекеме-уюмдардан 106 киши катышты.
Комитеттин төрайымы Чолпон Султанбекова бул мыйзам долбоору коомчулук үчүн маанилүү экенин, ага байланыштуу бардык кызыкдар тараптардын катышуусунда парламенттик угууларды өткөрүү чечмими кабыл алынганын белгиледи.
«Коммерциялык эмес уюмдар жөнүндө» мыйзамына жана Кылмыш-жаза кодексине өзгөртүү киргизүү тууралуу мыйзам долбоору буга чейин парламенттин Укук тартиби жана кылмыштуулук менен коррупцияга каршы күрөшүү комитетинде жана Конституциялык мыйзамдар, мамлекеттик түзүлүш, сот-укук маселелери боюнча комитетинде каралып, биринчи окууда кабыл алынган.
Мыйзам долбоорунун максаты тууралуу анын демилгечиси, депутат Надира Нарматова маалымат берди.
