Чоң-Алай районундагы мыйзамсыз менчиктештирилген эки жер тилкеси мамлекеттин балансына кайтарылды. Бул тууралуу УКМК билдирди.
2004-жылы уюшкан кылмыштуу топтун активдүү мүчөсү Ош облусунун Чоң-Алай районунун жергиликтүү өз алдынча башкаруу органдарына кысым көрсөтүп, мыйзамсыз түрдө 0,45 га жер тилкеси менен эки кабаттуу имаратты ээлеп алып, 2009-жылы 1536,99 м2 аянтты ээлеген «А» ресторан комплексин куруп алган.
Ошол эле учурда 1999-жылдын май айында Чоң-Алай райондук мамлекеттик администрациясынын айрым кызмат адамдары Дароот-Коргон айылынын борборундагы 0,17 гектар жер тилкесин мыйзамсыз түрдө жеке менчикке өткөрүп беришкен. Учурда аталган жер тилкесинин ээси болуп саналган жаран жер тилкесин өз ыктыяры менен мамлекеттин балансына өткөрүп берди.
